預售屋按揭申請

去年初買入的預售屋，終於在今年8月中辦好按揭手續，申請過程簡直係考驗我和我老公的耐性！

我老公因為已有台灣戶籍及身份証，所以由佢申請按揭，貸款成數會較高，最終可以做到七成半按揭。

係台灣買咗預售屋並唔可以即時去銀行申請按揭，要等到建案攞到使用執照後，或銀行通知後，始可申請。當時我和老公簽約買樓後，比較過幾間銀行，決定用匯豐銀行，因為按揭利率最低（約1.68厘），同埋個人情感覺得匯豐比靠可靠，最重要是可用卓越理財的環球轉賬換匯還款。

當初匯豐職員告知可以貸款8成，並可以用香港的收入來申請（在台灣沒有收入），只要連續6個月符合卓越理財資產的最低要求便可。其他銀行都係一樣，在台無收入的，一定要睇係香港既資產。

到了今年四、五月左右，台灣匯豐通知可以填申請書及遞交收入證明及銀行月結單（對賬單），經過前前後後多次要求補交額外文件証明，唔知點解唔一次過講要補啲咩文件，好似諗到一樣要補就同你先講一樣要補，唉⋯～

遞交文件方面，要準備最近6個月的銀行月結單，存摺記錄（影印簿仔），同時亦要提供糧單証明，總之預鬆少少比較穩陣。

申請表方面，可以填妥後郵寄或電郵去銀行，但建議最好親身去，因有咩甩漏可以即時更正、簽名或蓋章。

到了7月中左右，銀行先通知我地月結單當中有一個月資產不足，要補回其他銀行月結單證明，原來銀行計算資產方面，股票係以市價6折計，天啊！早講呀⋯⋯ 好彩都揾到其他銀行月結單，如果唔係，銀行只批到6成按揭。

正式對保嗰日，銀行會預早同你約好時間日期，連同預售屋建商代表及代書（類似香港既律師），正式簽合約及對數。

不過到最後批時，都係得7成半，原因係在台灣的銀行開戶不足五年，貸款係做唔到8成。所以銀行職員講既不能盡信。